საავტომობილო ტვირთს სამი დოკუმენტი ახლავს და სამივე ერთსა და იმავე საქონელს აღწერს: კომერციული ინვოისი, შეფუთვის ფურცელი და CMR ზედნადები. თითოეული სხვა მკითხველისთვის მზადდება, და დოკუმენტები ერთმანეთს მხოლოდ მაშინ ემთხვევა, თუ ვინმე შეამოწმებს. შეუსაბამობა კი გვიან ვლინდება: დატვირთვისას, საბაჟოზე ან მაშინ, როცა მყიდველი ყუთებს დაითვლის.
ეს გზამკვლევი მისთვისაა, ვინც ტვირთს აგზავნის ან იღებს: იმპორტიორისთვის, ექსპედიტორისთვის, საბაჟო ბროკერისთვის. აქ ნახავ, რა უნდა ემთხვეოდეს სამივე დოკუმენტში, როგორ გამოიყურება შეუსაბამობა ერთ გამოგონილ ტვირთზე და როგორ შეამოწმო ეს ყველაფერი ხელით. ტვირთის დოკუმენტებთან მუშაობისას ასეთი შეუსაბამობა ბევრჯერ მინახავს: უმეტესად ადგილების რაოდენობა ან წონა არ ემთხვეოდა.
ინვოისი, შეფუთვის ფურცელი და CMR ზედნადები: ვინ წერს და რისთვის
კომერციული ინვოისი გამყიდველის ანგარიშია მყიდველისთვის: რა გაიყიდა, რამდენი, რა ფასად, რა არის საბოლოო ჯამი (ხშირად სიტყვიერადაც), Incoterms-ის რომელი პირობით და რომელი ხელშეკრულების საფუძველზე. მყიდველი მის მიხედვით იხდის, საბაჟოზე კი ის საბაჟო დეკლარაციის ერთ-ერთი თანმხლები დოკუმენტია.
შეფუთვის ფურცელი (მას შეფუთვის სიასაც უწოდებენ) იმავე საქონელს ისე აღწერს, როგორც ის შეფუთულია: რამდენ ადგილშია თითოეული პოზიცია, რა არის მათი ნეტო და ბრუტო წონა და მოცულობა. მასში ინვოისის ნომერი და თარიღი წერია. ეს ის ფურცელია, რომელიც ყუთების დამთვლელს უჭირავს ხელში.
CMR ზედნადები საავტომობილო გადამზიდავის დოკუმენტია CMR კონვენციის მიხედვით. ის სამ ეგზემპლარად გამოიწერება და ხელს გამგზავნიც აწერს და გადამზიდავიც: პირველი გამგზავნს გადაეცემა, მეორე ტვირთს მიჰყვება, მესამე გადამზიდავთან რჩება (მე-5 მუხლი). მე-6 მუხლი ჩამოთვლის, რა უნდა ეწეროს ზედნადებში, მათ შორის გამგზავნისა და მიმღების დასახელება და მისამართი, სატვირთო ადგილების რაოდენობა, მათი მარკირება და ნუმერაცია, ბრუტო წონა და ინსტრუქციები საბაჟო ფორმალობებისთვის.
ანუ პირველ ორს გამყიდველი წერს, მესამე კი ერთადერთია, რომელსაც გადამზიდავიც აწერს ხელს.
რა უნდა ემთხვეოდეს ერთმანეთს
| მონაცემი | ინვოისი | შეფუთვის ფურცელი | CMR | რას იწვევს შეუსაბამობა |
|---|---|---|---|---|
| ადგილების რაოდენობა | თუ წერია | ჯამი | ჯამი, მუხ. 6(1)(g) | ივარაუდება, რომ გადამზიდავმა სწორედ ამდენი ადგილი მიიღო (მუხ. 9) |
| ბრუტო და ნეტო წონა | ორივე, თუ წერია | ორივე, ჯამი | ბრუტო, მუხ. 6(1)(h) | პასუხს გამგზავნი აგებს (მუხ. 7) |
| თითოეული პოზიციის რაოდენობა | ყოველი სტრიქონი | ყოველი სტრიქონი | — | თუ საბაჟომ საქონელი დაათვალიერა, ხარჯს დეკლარანტი იხდის (საბაჟო კოდექსი, მუხ. 97) |
| გამყიდველი და მიმღები | გამყიდველი, მიმღები | გამგზავნი, მიმღები | გამგზავნი, მიმღები | პასუხს გამგზავნი აგებს (მუხ. 7) |
| მითითებები დოკუმენტებს შორის | ხელშეკრულება (ნომერი, თარიღი) | ინვოისი (ნომერი, თარიღი) | ინვოისი და შეფუთვის ფურცელი, თანდართულ დოკუმენტებში | გადამზიდავი მათ არ ამოწმებს, პასუხს გამგზავნი აგებს (მუხ. 11) |
რას ამბობს CMR კონვენცია
ტვირთის მიღებისას გადამზიდავმა უნდა შეამოწმოს, სწორად წერია თუ არა ზედნადებში სატვირთო ადგილების რაოდენობა, მათი მარკირება და ნუმერაცია (მე-8 მუხლი). თუ გადამზიდავმა ზედნადებში შენიშვნა არ ჩაწერა, საპირისპიროს დამტკიცებამდე ივარაუდება, რომ ადგილების რაოდენობა ზედნადებში მითითებულს შეესაბამებოდა (მე-9 მუხლი). გამგზავნი გადამზიდავის წინაშე პასუხს აგებს არასწორ მონაცემებზე, მათ შორის დასახელებებზე, ადგილების რაოდენობასა და ბრუტო წონაზე (მე-7 მუხლი), და საბაჟოსთვის დართულ საბუთებზე, რომელთა სისწორის შემოწმება გადამზიდავს არ ევალება (მე-11 მუხლი).
შეუსაბამობა და საბაჟო დეკლარაცია
საბაჟო კოდექსის მიხედვით, საბაჟო ორგანოს შეუძლია შეისწავლოს რეგისტრირებული საბაჟო დეკლარაცია და მისი თანმხლები დოკუმენტები, მოითხოვოს დამატებითი დოკუმენტები და დაათვალიეროს საქონელი (მუხ. 96). რეგისტრირებულ საბაჟო დეკლარაციაში ცვლილების შეტანა დეკლარანტის განცხადებით საქონლის გაშვებამდე შეიძლება, მაგრამ აღარ შეიძლება მას შემდეგ, რაც საბაჟო ორგანო დეკლარაციის შემოწმების განზრახვას შეგატყობინებს ან მასში არასწორ მონაცემს აღმოაჩენს (მუხ. 90). თუ შეუსაბამობას დეკლარაციის წარდგენამდე აღმოაჩენ, საკმარისია ერთი დოკუმენტის გასწორება. თუ ის საბაჟომ აღმოაჩინა, შენი განცხადებით ვეღარ გაასწორებ.
აქ მხოლოდ იმას ვიმეორებ, რაც მუხლებში წერია. რას ნიშნავს ეს შენი ტვირთისთვის, საბაჟო ბროკერი ან იურისტი გეტყვის.
ერთი გამოგონილი ტვირთის შემოწმება
სკილ logisticshub-ის რელიზს 29 სადემო ნაკრები ახლავს: 7 ისეთი, სადაც ყველაფერი ემთხვევა, და 22, რომელშიც შეცდომა განზრახ არის შეტანილი. ავიღე ka-office-furniture/packages-mismatch: საოფისე ავეჯი ქაისერიდან (თურქეთი) თბილისში, ქართულენოვანი დოკუმენტებით. სადემო დოკუმენტების ყველა კომპანია, პირი და რიცხვი გამოგონილია.
გამყიდველი ინვოისში წერს 60 სამუჯრიან და 40 ორუჯრიან საოფისე ლითონის ტუმბოს: 13 300 ევრო, FCA ქაისერი, 100 ყუთში. შეფუთვის ფურცელი ემთხვევა: 60 და 40 ყუთი, სულ 100, ნეტო 1 680 კგ, ბრუტო 1 880 კგ. CMR ზედნადებში კი 60 და 30 ყუთია, სულ 90, წონა ისევ 1 880 კგ.
ნაკრებს თან ახლავს ამოკითხული მონაცემები: ოთხივე PDF-ის ყოველი მონაცემი ციტატითა და გვერდის ნომრით, ისე, როგორც აგენტი ჩაიწერდა მათი წაკითხვისას. ამიტომ თავად შემოწმებას მოდელი არ სჭირდება. რეპოზიტორიის v1.0.0 ვერსიის ასლში:
node skills/logisticshub/scripts/check.mjs \
fixtures/ka-office-furniture/packages-mismatch/extraction.json --lang ka
ეს არის ანგარიში, რომელსაც ის ბეჭდავს, ჩაწერილი ფაილების სიის გარეშე:
# დოკუმენტების შემოწმების ანგარიში
**შეცდომა: 1 · გაფრთხილება: 0** · შემოწმდა: 4 დოკუმენტი, 16 წესი
ამოკითხვა: ხარვეზი არ არის
## შეცდომები
### 1. QTY-01 · საქონლისა და ადგილების რაოდენობა
ადგილების რაოდენობა განსხვავდება: ინვოისში 100, შეფუთვის ფურცელში 100, CMR-ში 90.
- ინვოისი AOS-INV-2026-0918-01 (invoice.pdf), გვ. 1 · ადგილების რაოდენობა: „100 ყუთი“
- შეფუთვის ფურცელი AOS-PL-2026-0919-01 (packing-list.pdf), გვ. 1 · ადგილების საერთო რაოდენობა: „100“
- CMR CDT-CMR-2026-0919-01 (cmr.pdf), გვ. 1 · ადგილების საერთო რაოდენობა: „90“
→ შეადარე ფაქტობრივად დატვირთულ საქონელს: თითოეული პოზიციის რაოდენობაც და ადგილების რაოდენობაც ყველა დოკუმენტში ერთნაირი უნდა იყოს.
---
შექმნილია Logisticshub-ით
სხვა არაფერი აღმოჩნდა: მისი წესების მიხედვით, მხარეების დასახელებები, დოკუმენტებს შორის მითითებები, თარიღები და წონა ემთხვევა. ყოველი PDF, რომელშიც შეუსაბამობაა, მონიშნულ ასლადაც ბრუნდება. აი, CMR-ის ტვირთის ცხრილის ნაწილი:

ანგარიში რაოდენობაზე ჩერდება, ბოლო სტრიქონი კი გეუბნება, სად ეძებო მიზეზი: დატვირთვაში. CMR-ში კიდევ ერთი მინიშნებაა, რომელსაც არცერთი წესი არ კითხულობს. მეორე სტრიქონის მარკირება 061-დან 100-მდეა: ორმოცი ყუთის ნომერი ოცდაათი ყუთისთვის. ან რაოდენობაა არასწორი, ან მარკირება, და რომელი, ამას მხოლოდ ის გეტყვის, ვინც მანქანა დატვირთა.
ათწუთიანი შემოწმება ხელით
სამივე დოკუმენტი გვერდიგვერდ დადე და:
- ადგილები. იპოვე ადგილების რაოდენობა ინვოისში (თუ წერია), შეფუთვის ფურცლის ჯამი და CMR-ის ჯამი. მერე CMR-ის სტრიქონები თავად შეკრიბე: ჯამი შეიძლება სწორი იყოს, სტრიქონები კი არა.
- მარკირება. 001–060-ის მსგავსი დიაპაზონიც რაოდენობაა. ის თავისი სტრიქონის ადგილების რაოდენობას უნდა უდრიდეს.
- წონა. ბრუტო წონა შეფუთვის ფურცელში, CMR-სა და ინვოისში (თუ წერია) ერთი და იგივე უნდა იყოს. ნეტო წონა ინვოისსა და შეფუთვის ფურცელში ერთი უნდა იყოს. ბრუტო ნეტოზე ნაკლები არ უნდა იყოს.
- პოზიციები. ინვოისისა და შეფუთვის ფურცლის სტრიქონები მოდელის კოდით დააწყვილე და არა სტრიქონის ნომრით, მერე რაოდენობები შეადარე.
- დასახელებები. ინვოისის გამყიდველი შეფუთვის ფურცლისა და CMR-ის გამგზავნია. მიმღები სამივეში ერთია.
- მითითებები. შეფუთვის ფურცელში მითითებულია ინვოისის ნომერი და თარიღი. CMR-ის თანდართულ დოკუმენტებში უნდა იყოს ინვოისიც და შეფუთვის ფურცელიც. ინვოისში მითითებულია ხელშეკრულება.
- თარიღები. ჯერ ხელშეკრულება, მერე ინვოისი, მერე დღე, როცა გადამზიდავმა ტვირთი მიიღო.
გვერდიგვერდ კითხვისას ორი რამ გამოგრჩება: თითოეული დოკუმენტის შიდა ჯამები (რაოდენობა × ფასი, საქონლის ღირებულება, სიტყვიერად დაწერილი თანხა), რომლებსაც კალკულატორი სჭირდება, და მონაცემი, რომელიც სამივე დოკუმენტში ერთნაირია, ტვირთისთვის კი არასწორი.
სად გამოგადგება სკილი და რა არ შეუძლია
Logisticshub ღია კოდის სკილია, რომელიც ამ შემოწმებისთვის ავაწყე (MIT ლიცენზიით). ავაწყე ისე, რომ საქმე ორად გაიყოს: PDF-ს აგენტი კარგად კითხულობს, არითმეტიკა კი კოდს უკეთ გამოსდის და ყოველთვის ერთსა და იმავე პასუხს იძლევა. შენი აგენტი (Claude Code, Codex, Cursor და სხვები) ყოველ PDF-ს კითხულობს და თითოეულ მონაცემს ზუსტი ციტატითა და გვერდის ნომრით იწერს. დანარჩენს კოდი აკეთებს: შემმოწმებელი ჯერ ადგენს, მართლა წერია თუ არა ყოველი ციტატა მითითებულ გვერდზე, მერე კი 16 ფიქსირებულ წესს ზუსტი ათობითი არითმეტიკით იყენებს, ამიტომ ერთი და იგივე მონაცემები ყოველთვის ერთსა და იმავე ანგარიშს იძლევა. ზემოთ, ცხრილში ჩამოთვლილ მონაცემებს მისი წესები QTY-01, WGT-02, PTY-01 და REF-01 ამოწმებს, თითოეული კი ზუსტად წესების ცნობარშია აღწერილი (ინგლისურად).
რას არ აკეთებს, მისივე დოკუმენტაციის მიხედვით:
- ერთი გაშვება ერთ ტვირთს ამოწმებს.
- წარმოშობის ქვეყანა და HS კოდები მხოლოდ იწერება: არც სატარიფო კლასიფიკაცია ხდება, არც ბაჟისა და გადასახადის გამოთვლა, არც საბაჟო დეკლარაციის შევსება.
- მხოლოდ მხარეების დასახელებებს ადარებს და არა მისამართებს, საგადასახადო ნომრებს, ხელმოწერებს ან ბეჭდებს; სხვადასხვა დამწერლობით დაწერილ დასახელებებს ერთმანეთს არ ადარებს.
- მოცულობას დოკუმენტებს შორის არ ადარებს და ზომის ერთეულებს არ გადაიყვანს.
- კონოსამენტს, წარმოშობის სერტიფიკატს და დაზღვევის პოლისს არ კითხულობს.
- ვერ გაიგებს, რა დაიტვირთა ფაქტობრივად და ნამდვილია თუ არა დოკუმენტი.
ანგარიშში ნაპოვნი შეუსაბამობა განაჩენი არ არის: ის ორიგინალებთან უნდა გადაამოწმო. Logisticshub-ს სერვერი არ აქვს, ამიტომ მას არაფერი ეგზავნება: დოკუმენტებს შენი აგენტი თავისი მოდელით კითხულობს.
სად წაიკითხო მეტი
სკილის გვერდზე ნახავ დაყენების ბრძანებებს, მარტივად აღწერილ შემოწმებებს და შეზღუდვების სრულ სიას: /logisticshub.